Í nóvember s.l. var lögð fram skýrsla Almennu Verkfræðistofunnar um „Umferðarmál í aðalskipulagi Mosfellsbæjar.“ Í skýrslunni er einkum fjallað um Vesturlandsveg og áhrif hans á byggðina. Skoðaðir eru ýmsir valkostir um útfærslur gatnamóta, m.a. með hugsanlegri „stokkalausn“ næst miðbænum. Í skýrslunni er einnig fjallað um flokkun gatna í aðalskipulaginu og hlutverk væntanlegs Hafravatnsvegar.

Skýrslan var unnin að beiðni Mosfellsbæjar í tengslum við endurskoðun aðalskipulagsins og er aðalhöfundur hennar Þórarinn Hjaltason verkfræðingur hjá Almennu Verkfræðistofunni. Hún fjallar að meginefni til um Vesturlandsveg, en Mosfellsbær hafði óskað eftir að kannaðir yrðu möguleikar á að minnka neikvæð áhrif Vesturlandsvegar á bæjarbrag og heilnæmt umhverfi í Mosfellsbæ (klofningsáhrif, loft- og hljóðmengun, umferðaröryggi, landnýting o.fl.). Þetta yrði skoðað frá ýmsum hliðum, s.s. útfrá mismunandi útfærslum vegarins sjálfs og gatnamóta við hann. Skoðaðir yrðu möguleikar á vegurinn verði í stokk eða niðurgrafinn að hluta frá Langatanga í suðri að Varmá í norðri og lagt mat á það hver væri eðlilegur hámarkshraði umferðar um veginn.

Síðustu tveir kaflar skýrslunnar fjalla síðan annars vegar um flokkun gatna í aðalskipulagi Mosfellsbæjar með tilliti til hæfilegrar möskvastærðar tengiveganets, og hinsvegar um svæðisbundna þýðingu Hafravatnsvegar samanborið við aðra stofnvegi á höfuðborgarsvæðinu og mat á því hvort eðlilegt sé að hann flokkist sem þjóðvegur.
 
Í skýrslunni er gengið útfrá umferðarspá VSÓ ráðgjafar, sem er reiknuð er útfrá íbúafjöldanum 23.000 manns í Mosfellsbæ, en tekið er þó fram að að sú spá sé eingöngu framreikningur á núverandi ástandi, miðað við óbreyttar ferðavenjur og samgöngumáta. Með markvissum aðgerðum sé hægt að hafa áhrif á þessa þætti og draga úr notkun einkabílsins, þannig að umferðin verði minni en spáin gerir ráð fyrir. Fram kemur að meirihluti ferða um Vesturlandsveg á upphaf eða endi innan bæjarins, gegnumakstur er nú um 25-30% umferðarinnar, en verður 20-25% samkvæmt spánni.

Gerð er grein fyrir því að hlutverk Vesturlandsvegar í þjóðvegakerfinu og umferðin um hann ræðst að töluverðu leyti af því hvort og hvenær Sundabraut verður að veruleika. Með tilkomu hennar myndi létta töluvert á umferðinni um Vesturlandsveg og hlutverk hans myndi breytast úr því að vera meginstofnvegur milli landshluta í það að vera „venjulegur“ stofnvegur innan svæðis, en til slíkra vega eru gerðar minni kröfur, m.a. um útfærslur gatnamóta.
 
Ítarlega er fjallað um hugsanlegar gerðir gatnamóta við Vesturlandsveg, en í núgildandi aðalskipulagi eru sýnd mislæg gatnamót á 5 stöðum (við Korpúlfstaðaveg, Baugshlíð, Þverholt, Þingvallaveg og Leirvogstungu) og mislægar þveranir, þar sem innanbæjarvegur fer undir Vesturlandsveg, á tveimur stöðum (við Langatanga og Álafossveg/Helgafellsveg). Á öllum þessum stöðum eru nú hringtorg, en á einum þeirra eru mislæg gatnamót í byggingu, þ.e. við Leirvogstungu/Tungumela.
Í skýrslunni eru settir fram og bornir saman 3 meginkostir, hver þeirra með tveimur variöntum:

• Öll vegamót mislæg, án stokkalausnar (a) og með (b).
• Blandaðar lausnir, umferðarmestu gatnamót mislæg (a) eða með þreföldum hringtorgum (b), önnur með tvöföldum hringtorgum og sérlausnum.
• Öll vegamót í plani, með þreföldum hringtorgum og sérlausnum (a) eða öll með tvöföldum hringtorgum (b).

Niðurstaða skýrsluhöfundar er að leggja til að í aðalskipulaginu verði gengið útfrá kostum 2b eða 3a. Talið er líklegt að þessir kostir gætu dugað til lengri framtíðar (30-40 ár) ef Sundabraut verður komin til sögunnar áður en íbúafjöldinn nær því marki sem miðað er við í umferðarspá VSÓ (23.000 manns). Vegna þeirrar óvissu sem ríkir um Sundabraut er þó lagt til að í skipulaginu verði tekið frá landrými fyrir kost 1b, ef svo færi að Vesturlandsvegur yrði að gegna hlutverki meginstofnvegar til lengri framtíðar.

Skýrslan sjálf sem pdf (1,85 MB)
Glærukynning á skýrslunni (pdf, 2,1 MB)