Hugmyndasamkeppni um aðkomutákn fyrir Mosfellsbæ

12/03/2018

Mosfellsbær í samvinnu við Hönnunarmiðstöð Íslands efnir til samkeppni um hönnun á nýju aðkomutákni / einkenni til að marka þær þrjár aðkomur að bænum.

Mosfellsbær leitar eftir hugmyndum um nýtt aðkomutákn sem sett verður upp við aðkomuleiðir inn í Mosfellsbær. Aðkomutákninu er ætlað að vekja athygli á Mosfellsbæ og marka það svæði sem honum tilheyrir.

Leitað er að tákni fyrir bæinn sem er ætlað að marka aðkomustaði við bæjarmörk en einnig að þema þess verði nýtt á margvíslegan hátt eins og við gerð listmuna, bréfsefnis, vefsíðu o.s.f.v.

Vinnings hugmyndin verður framkvæmd á þeim þremur bæjarmörkum að Mosfellsbæ, frá Reykjavík, Þingvallavegi og Kjalarnesi.

Unnið verður með vinningshafa að frekari hönnun og útfærslu tillögunnar og fer samkeppnin fram samkvæmt samkeppnislýsingu, fylgigögnum og samkeppnisreglum Hönnunarmiðstöðvar Íslands.

Helstu áherslur sem horft verður til í mati á tillögum keppenda:
Aðkomutáknið þarf að vera grípandi, falla vel að umhverfinu, vera dæmi um góða hönnun og listsköpun, auk þess að vera lýsandi fyrir það sem einkennir Mosfellsbæ. Sérstaklega skal horft til einstakrar náttúru bæjarlandsins.

Í ágúst 2017 eru liðin 30 frá því að Mosfellsbær fékk kaupstaðarréttindi. Ákveðið var af því tilefni að efna til þessarar hugmyndasamkeppni um aðkomutákn og er stefnt að því að vígja vinningstillöguna á 31. árs afmæli bæjarins í ágúst nk.

Verðlaunafé
Fyrstu verðlaun eru samtals 2.000.000 króna og verða veitt fyrir þá tillögu sem valin verður í fyrsta sæti.

Nánari upplýsingar um Mosfellsbæ og verkefnið
Á heimasíðu Hönnunarmiðstöðvar má finna nánari lýsingu og vísun á vefslóðir ásamt fróðlegu efni til innblásturs og upplýsinga - www.honnunarmidstod.is.

VILT ÞÚ TAKA ÞÁTT ?
Fyrir áhugasama þátttakendur eru nánari upplýsingar um samkeppnina að finna á vefslóðinni www.honnunarmidstod.is og heimasíðu Mosfellsbæjar: www.mos.is/honnunarsamkeppni.

Skilafrestur tillagna er til hádegis þriðjudaginn 10. apríl 2018


Til baka