Upptökur á fundum bæjarstjórnar Mosfellsbæjar

13.04.2016
Samþykkt á 668. fundi bæjarstjórnar þann 30. mars 2016 
Afgreitt á 1251. fundi bæjarráðs þann 17. mars 2016

1. gr.

Með vísan til 15. gr. a. Ritun fundargerða í samþykkt um stjórn Mosfellsbæjar, þar sem bæjarstjórn getur ákveðið að umræður á bæjarstjórnarfundi verði hljóðritaðar eða teknar upp með öðrum hætti, samþykkir bæjarstjórn að taka skuli upp í hljóð og mynd alla fundi bæjarstjórnar, svo sem nánar er fyrir um mælt í reglum þessum.

2. gr.
Upptökur funda bæjarstjórnar skulu fara fram nema málefnalegar og/eða tæknilegar ástæður hamli.

3. gr.
Upptökur skulu hefjast um leið og forseti setur fund bæjarstjórnar og lýkur þegar forseti slítur fundi. Sé tekið fundarhlé er upptaka stöðvuð á meðan fundarhlé varir.

4. gr.
Upptökur skulu framkvæmdar af stjórnsýslu bæjarins/ starfsmönnum fundarins hverju sinni og skulu þær varðveittar í skjalasafni bæjarins á sama hátt og gildir um fundargerðir bæjarstjórnar á rafrænu formi og pappírsformi.

5. gr.
Upptökur af bæjarstjórnarfundum eru eign Mosfellsbæjar. Bæjarstjórn Mosfellsbæjar óskar vinsamlega eftir því að upptökurnar verði eingöngu notaðar í málefnalegum og lögmætum tilgangi og ekki til að afbaka eða til að gefa vísvitandi ranga mynd af þeim umræðum sem fram hafa farið á fundi bæjarstjórnar.

6. gr.
Upptökur skulu vera aðgengilegar á heimasíðu Mosfellsbæjar með sama eða sambærilegum hætti og gildir um fundargerðir bæjarstjórnar.

7. gr.
Reglur þessar um upptökur á fundum bæjarstjórnar eru staðfestar af bæjarstjórn Mosfellsbæjar þann 30. mars 2016 og gilda þar til þeim kann að verða breytt.

Til baka